仲記得幾年前，我嘅目標係入香港電視到做，依家諗返起都唔知係開心定唔開心
幾年前升大學揀科排Jupas，對於文科嘅我真係無咩選擇，拎住本Jupas guide睇下大學嘅科，醫科律師依啲神科又讀唔到，理科我又讀唔到，純文科我怕讀完出黎乞食，加上教師依一行又唔好景，剩返一大堆成日都聽人講嘅" BBA" 商科，嗰陣都唔知
"BBA" 全名係指咩就跟人講要揀BBA黎讀，只係人云亦云，全香港都講緊商業金融，唔讀好似輸哂起跑線咁，但問心個句，自己係唔想讀，因為每間U都有大量商科，加上副學士同埋一堆學院又攪商科，每年畢業至少成千上萬嘅商科生出黎搵工，又有幾多位比你做，最後可能淪為文員仔或者售貨員，所以都唔係好想讀商科。
嗰刻差唔多咩科都比我飛走哂，雖然讀大學唔應該為將來份工，而係為知識興趣，但點都要為將來生活打算下。
而我嘅興趣就係想拍劇，寫故仔，大想頭啲就係拍電影，即係想加入電視或者電影界。
嗰陣想揀媒體黎讀，但同朋友商量過，讀電視電影? 係咪想畢業出黎乞食?
電影依一行，聽講好難上位同入行，加上香港電影已經唔知幾時開始出現衰落，係唔係乞食同前景仍然充滿未知之數。
而電視就可以肯定答到你，你讀完一定會乞食! 嗰陣只有亞視同TVB，亞視根本不值一提，垃圾，係社會上浪費資源同生人霸死地嘅表表者，去亞視做仲有咩前途可言，佢幾耐無拍過劇? 佢會唔會有錢請你? 佢會唔會請我返去坐係個控制室睇住啲重播片? 就算入到去做都唔敢同人講自己係亞視做......
而一台獨大嘅TVB，基本上想做電視依一行，都以入TVB為目標，但我地調查過後，得知人工真係低到痴線，加上行內人都極度討厭TVB制度，就算你大學畢業，做到隻狗咁都可能得到幾千蚊嘅人工，而且好難有機會上位同做自己鐘意做嘅野，雖則岩岩讀完書出黎做野點都要學野，由低做起，但如果有機會上位，我地又點會介意由低做起呢? 但係TVB到，我地真係覺得係一個死胡同，睇唔到將來同前景。
點知，開始傳出香港電視申請發牌，依個消息真係完完全全打動左我同一班朋友嘅心，仲因為依個消息而討論左好耐，我地諗野好簡單，只係覺得有一間新嘅電視台出現，我地依班新人就可以入去做，去學野，至少無一班老屎Fuck係到阻住創新同守舊嘅制度，加上香港電視仲好強調創新製作，令到我地依班人真係好想入去做，仲心急到好想政府即刻發牌。
最後我聽人講，排Jupas，A1要博，A2要穩陣，最後我將媒體放入A2，諗住穩穩陣陣入去讀，讀完即刻去香港電視見工，嗰陣仲同班朋友想報啲Course關於寫劇本，拍攝黎增值自己。
好記得面試嗰陣，我準備左好多作品同埋計劃書，講述依家電視劇集質素幾咁低同有咩建議去改善......最大主因都係TVB一台獨大，無競爭自然無創新，而我都膽粗粗寫左好多故事，仲搵左一班朋友仔一齊拍片，好記得嗰陣為左一個幾十秒嘅鏡頭而拍左幾粒鐘，我地無專業訓練都無專業知識，但我地起碼都識分咩叫" 好睇" 咩叫 "唔好睇" ，即使用左好多時間去拍，但我地仍然樂在其中。
面試個老師睇完我作品，都讚我有誠意，因為7位面試人當中只有我交影片，其他人都只係拎啲畫同文字作品黎當作品，最後小組討論同播放左當年某個電視廣告，問我地有咩意見，我地都作出激烈嘅討論。
完結嗰陣，面試老師話我地依7個人各有各專長，有人寫故好叻，有人設計好叻，有人拍片好勁，如果我地7個人組合成一個團體，相信會係一個好出色嘅組合，雖然大學唔可以提早話收你，但佢都忍唔住話想收哂我地7個人，令到我地勁開心。走出房門，我地都交換電話認識大家，原來大家竟然都有一個目標，就係加入香港電視，似乎大家都留意到段新聞，嗰陣真係充滿熱血同希望。
最後只有我一個無比大學收到，其他6個人都收哂入依一科，原因係我入左A1，嗰陣都幾灰，只有我一個無入到，好嬲自己點解唔放入A1到，最後都同佢地慢慢失去聯絡，而我唯有當興趣，係高登講故台到寫下故，過下癮就算。
直到依家畢業，人工都有接近20K，都算夠食，但依家見到香港電視不獲發牌，我諗起當年嗰6個人點算，係咪又變返乞食? 出路又點? 定係死死氣去TVB到接受奴工制度同薪水?
同時我又諗我係咪開心當年入唔到依一科? 如果唔係我依家係咪畢業變失業?
屌你老母香港政府!難得有間電視台可以比我地去試下，去創作，帶比我地希望，依家無原因地將所有野消滅哂，一切又回歸返以前，睇住前幾日TVB東張西望叫人返黎入去做，真係深深感受到TVB嘅無恥......但我地又可以點?
係香港，仲有咩工可以發圍? 仲有咩工可以選擇?
依家啲人揀科仲敢唔敢揀媒體創作?
香港真係一個好唔健康嘅城市。
人最無奈嘅係.....你眼見問題所在，都只能夠睇住個問題慢慢惡化，你都無能為力去改善。
Search